楝悉先機：風雲武士繼續進步

魑魅魍魉

　　送虎迎兔，大年初三跑馬，在此祝願世界和平，天災人禍遠離我們。諸君福澤綿綿，生生猛猛，開開心心，事事順意，最緊要當然係有健康體魄，做起事上嚟，先至頭頭是道。講到今日阿棟焦點，唔揀大摩都唔知揀邊個好！真係睇吓佢贏到幾多場，三兩場，其實好正常！

　　第三場第四班1200米。「風雲武士」近兩仗轉了配件後，陣上演出有眼見，雖然一再屈居人後，連做兩次阿二，但所負距離唔係多，未試過輸多過1 個身位。事實上，之前兩役皆在蝕位情況下跑得好，唔係佢夠斤両，點會克服到。不幸地，今仗又排外檔，好在聽手足講，隻馬跑完上場繼續進步，希望可以贏番場。

幸運來對手曳

　　第五場第五班1400米。「幸運來」轉苗廐初出已上名，當時出閘已經差，谷草又唔係主場，一樣後上衝贏兩匹有根據嘅「濰坊」及「無敵鷹王」，嗰個第三名水準幾好，證明他投之後，進度唔係冇。今場改戰田草1400米，當然百利而無一害。只要馬偉昌唔好出閘再執輸，做啱晒留放，對住一批水皮對手，唔難爭出頭。

　　第九場第三班1200米。「威皇鷹」久休復出贏得輕鬆，當時喺直路，眼見白德民冇乜緊張過，好似晨操姿態咁，扣住沿外檔，一樣話過就過，贏到好似超兩班或以上。估計加12分都係雞毛蒜皮，對爭勝毫無阻力，今場獨贏實係十幾蚊，勝在夠穩。

點買法

　　新正頭，梗係想攞頭彩。大摩嘅馬可能幫到大家， 阿棟會揀「威皇鷹」做重心，W冇乜肉食， 所以用嚟拖QT，腳拖１ 、８ 、９、１２ ，希望扭一扭，跑到啲冷腳，有得分吓。如果WP，「幸運來」最博得過，急於交代，鬥志好， 唔信佢又信邊匹好！

陳華棟　資深評馬人