楝悉先機：勁勇士唔驚(2) (12)

猪拉多纳

　　兔年第1日跑馬，阿棟總算有啲運仔，賽前亦同大家分析過，WP捧「幸運來」，QT就博第9場，結果真係扭歪咗，輸Q中T，希望幫到你哋。而嚟到今期谷戰，收到料尾場唔係咁簡單，人人諗住(2) (12)會係死Q，賽果亦有可能會令大家意外，所以，要好小心拆局。

　　第四場第三班1200米。「再來風」上場沿途二叠，入到直路還有餘力保住第二，演出比想像中出色。其實，目前評分點會冇着數，季初喺69分入Q，嗰場係唔合適嘅谷草1000米，依家66分，跑谷草1200米，有1檔幫手，畀佢放得順，對手末段唔易追到。

十足十趁弗搏

　　第五場第四班1800米。「十足十」上場贏馬功勞盡歸馬偉昌，好少見佢咁醒目，中外檔起步，但未轉首彎已經埋到欄，洞察力及機動性一流，如果唔係早段慳晒，拉士未必頂得住今次又同場嘅「金瑞」。今仗趁弗再戰勝途，如處理一如上場咁理想，仍有贏面。

　　第八場第二班1200米。「勁勇士」同場遇到「錢照贏」及「文武維揚」，聲勢或有不如，但一日未真正鍊過，係咪唔夠揪？真係唔清楚！而聽番班手足講，「勁勇士」雖然12月尾退出過，唞一陣就復課，影響有限。而佢上場可以贏到「滙名燈」甩晒，估計仍夠班。如果因為10檔及強敵當前，令佢好分咗，更加抵買。

點買法

　　尾場有冷膽，咁就唔怕博，一於簡簡單單，(7)拖(2)、(12)買Q，兩注搞掂，而三重彩就複式膽，除咗上述兩配腳之外，(1)、(3)、(10)亦可加入考慮。WP方面，「十足十」最有信心，始終睇過今晚方仔出馬陣容，應該大手出擊，呢匹新勝馬實係主力之一。

陳華棟