洪禮賢講馬：軍事攻略有力反先

港陌

　　第九場一級賽1800米草地。「軍事攻略」及「天久」，繼經典一哩之後，又喺次關交手，有冇機會反先？如果路程冇變，可能性微乎其微，但因為加程200 米，已經有變數存在，後駒長力掹唔掹到1800米，確係一個大問題，前駒跑長啲又會叻幾多，亦係一個關鍵。更何況，如果周日有雨粉，場地狀況有變，對佢哋嘅發揮又會幫到（害到）咩程度？同樣係對今場勝負有着影響。

　　對於「軍事攻略」今場反先機會樂觀，唔係純粹因為路程加長，主要原因係「天久」上場1600米贏得冇預期咁易，個幾身位係表面距離，如果比較上場和3仗前贏1400米嘅姿態，上場去到尾段，柏寶冇之前嗰場咁瀟灑及謹慎好多，此外，「軍事攻略」上場沿路表現又比初出一役心情輕鬆了。假設兩駒今仗喺 1800米嘅能力值，1隻保持，1隻略升，賽果已有改寫可能。

　　第十場二班1600米草地。「人人興旺」剛仗加罩卻出閘慢晒，一起步已輸三幾個身位，入到直路又唔係暢行無阻，喺內欄幾經辛苦先望空到，所以，唔係純粹賺到內欄慳位之利，先至入到Q。

　　今仗又會唔會出唔到閘，唔多清楚，既然賽前有細閘，預演在先，希望人與馬落場跑，出閘唔會「藕豆」。至於能力方面，二班未必超卓，好在當打，演出準，並有爭分概念，尾場揀膽，最為四正。