洪禮賢講馬：第三口孖T 韋達叫兩飛

魑魅魍魉

　　第九場三班1800米草地。「智多飛」一口氣贏3場，喺3場勝仗當中，仲未有對手可以埋到身，四班如是，升到三班依然係咁，係咪賽事級數普通出現嘅假象？呢點唔排除，之但係，睇佢上場締速及姿態，又真係誇張得滯，除咗因為最後百幾米已經透出，贏到甩晒之外，佢以1.47.66時間完成，係季內十幾二十場同程第三快，話晒首次上三班，贏到好似大人同細路仔玩咁款，加12分，唔覺重手。

　　今場對手係強咗，但佢嘅最大敵人反而係重磅，負133磅唔係冇壓力，負重能力係點？並唔係狀態及級數取決，如果負重能力唔係差，四連捷大有機會。

　　第十場二班1600米草地。「勁飛寶」上場終於擺脫鬥親「甜將」例輸嘅宿命，但係咪贏得漂亮，其實真係各有各觀點，當場「甜將」擺錯位已經直接幫咗佢，另外，如果睇番佢上場走勢，頭三段超過1分鐘，比標準分段慢咗1秒有多，完全係慢放受益者，其實加10分係略嫌多。

　　睇完上場表現，唔覺能力比前大躍進，所以，喺二班負重，未必贏得晒，好在佢一向演出穩定，跑法好彈性，前置及中置一樣得，唔會太受檔位及形勢影響，正常情況下，唔難交出十足功力，但買W就唔建議，用嚟做膽應該勝任，希望133磅唔會令佢斷纜。