洪禮賢講馬：爪皇盛水 劣習盡除

港陌

　　第六場一班1650米。「皇帝旨令」5W後已連續兩場唔上名，評分已經盡晒？勢頭回落？我又唔會咁睇，講到近況，唔覺佢有顯著回落，近兩仗冇影，其實都有藉口原諒，好似前仗1400米咁，喺對面直路留到隻馬忟晒，仲要曾經勒避，拉士點會識追。而上場谷草一哩，喺末段正想抄出外叠衝之際，先畀「利好」封咗前路，繼而再畀「驚喜」干擾，如果唔係兩番遇阻滯，可能會有得衝吓。

　　上季未轉馬房之前，曾兩度角逐泥地賽，一而再採用大外叠跟前跑法，拉士卻唔輸得遠，點睇都唔似抗拒泥地；表面上，今場既要跑高一班又要轉場，變數多了，但望真同場掛頭牌係91分之馬，而本身喺泥地早有經驗，諗深一層，又唔係想像中咁大轉變。只要今場前中段唔慢，末段可能就係佢嘅世界。

　　第七場三班1200米。「爪皇盛水」早於季初已曾試泥閘，仲要唔係1次，9月試完，11月中再試過，兩次試得都唔錯，雖然泥閘歸泥閘，落場跑可以完全唔識行（「火熱動感」及「易搏贏」已經係好例子），但我總係覺得隻馬仲有上升空間，尤其現時教到好好地，陣上唔似以前咁搶口及難操控，能力點都叻過贏馬時。當然，今場仲要顧及埋昌哥走位（8檔或會沿路三叠），唯有希望多快馬同場，令騎師易於搵遮擋，留放唔好有大錯，咁就好大機會入三甲。

馬會賽馬節目主持　洪禮賢