賠率有路捉：貝利高P飛好勁

港陌

　　噚日睇飛數，第八場「貝利高」個P得13蚊做大熱門，都可以話係出人意表，事關同場其實有兩匹馬理應比佢更有P飛，但都唔夠佢啲墊底飛重，佢哋分別係上仗包Q嘅「傾力之城」同埋「陽明深心」，呢兩隻馬齊齊跑贏超級馬「甜將」，「貝利高」個位置都熱過佢哋，可見個信心其實唔止賠率上嘅偏差咁細。

　　「貝利高」近幾場最後賠率多數二十倍左右，加上佢唞咗兩個幾月先出嚟跑，所以筆者喺未開飛前覺得佢個W應該有三十倍先啱，結果比預期熱咗，得 13倍，位置更成為大熱，點可以唔吼吓。講到佢嘅戰績，雖然近來三仗係差啲，最叻得第七，上次更輸九個馬位做咗「十一少」，但如果貨比貨，佢季初都叫喺一班入過三甲，壓倒之後贏埋三級賽嘅「飛銀動力」，今次P飛咁堅，可能唞完即搏，不妨捧吓。

韋達騎師王熱透

　　騎師王方面，韋達喺賠率上又一枝獨秀，跟得最貼嘅柏寶都有47.5蚊，前者飛數咁堅，可能同「勁飛寶」同「喜惑」夠勁有關，既然係咁，熱啲都要揀。　

周仲