洪禮賢講馬：智多飛較量印度光輝旺國手 薄荷糖勁力博愛福星百事凰

魑魅魍魉

　　今日沙田賽事喺C+3欄上演，模式好少出現反覆，後上馬通常較難爭取成績。當然，如像上期的話，則一面倒不利前置。

重心場次　第10場　第二班（100-80分）1600米

　　「卡達聖」前仗同程幾乎與「勁飛寶」串Q，實力在二班一定唔會下風。剛仗則認為擺位太進取，略與馬性有出入，跑得唔好可原諒。希望今場因應轉場及換人，做番啱留放，唔係冇機會贏。

　　「人人興旺」與「勁高手」，優點係準開，以及路程性能一流。「軍事行動」有級數唔怕縮程，加上，近試所見係比前乖了。「滿綵」如果陣上犯錯地方比上場少，已具上名資格。「正毅」總覺1400米較有把握。「邦先生」上場太差，唔通仍處「消案」緩衝期？！「皇龍戰駒」唔係外檔，以目前態況，其實可拖。

第1場　第四班（60-40分）1200米

　　「添福駿驥」連續兩場入Q，現階段喺四班唔係冇地位，但今場頂磅兼大外檔，略有影響。「神童」及「飛躍之駒」，進度明顯不及前駒，陣上仍有幾明顯缺點，不過，處身此賽已具上名條件。

　　「般若」情況與前兩駒差不多，成熟程度未夠（初出喺直路兩邊閃），是次排1檔，唔使再喺外叠蝕，可能跑高啲。「贏啲啲」隔夜忽然好多飛，但大幅縮程有疑慮。

第2場　第四班（60-40分）1800米

　　「無雙小子」降四班反客為主，長途有晒證明，爭勝機會大。「俊威威」贏在跑法及近況。「雪蹄靈驥」和「奔騰飛駒」，上場2000米同場，前駒出彎蝕得多至會冇P，如是場韋達喺取位方面做得妥善，或可提升名次，而後駒係擔心排外檔，騎者沿路攞位會蝕章。「壽比南山」和「福陞」略賺分，但談不上信心。

第3場　第三班（85-60分）1800米

　　「智多飛」3歲仔負133磅尚且入Q，已當贏了，如有過實戰經驗後，負重能力有改善，有權贏番。「較量」及「旺國手」負中磅喺三班，長期有卡士。

　　「印度光輝」對上兩場敗仗，唔見得係輸實力，換番最了解馬性嘅德叔，畀埋最後機會。「朝東飛駒」加程未必會比1600米好。「神州八號」及「牛精財星」，一對東廐馬，跑法上應以前駒較可取。

第4場　第五班（40-0分）1600米

　　「標青」3仗前同程得殿軍，喺佢前面嘅二三名，俱於季內贏過四班1600米，攞住嗰場賽績，處身今場贏晒級數，有埋1檔仲夾埋佢前置跑法。

　　「暖在心頭」與「大衛金剛」，上場同程分獲亞季軍，話晒係輸畀再出喺四班上名嘅「奪錶」，水準應要重視。「嘉寶神駒」兩場同程跑得好（前仗賽後腳痛，上場全程外叠），今場3檔或會令能力略增。「神箭金剛」分數已有利多時，係睇形勢就唔就。

第5場　第四班（60-40分）1400米

　　「薄荷糖」跑落唔加程，或是能力未能再上最大問題，所以，未必要介意剛賽名次退步，呢場轉至中程，有望發揮應有水準。「勁力」上場沿途在外錯晒都有P，克服難度嘅指數爆燈咁滯。

　　「百事凰」前仗係咪偶一為之，睇埋今場轉配件及換人嘅效果。「博愛福星」剛賽直路早段，騎者表現戇居，冇立心楔埋便，若不，唔會冇三甲，初跑同程有此成績，冇理由轉用柏寶唔跟多場。「幸運勇士」好位會幫到幾多。

第6場　第四班（60-40分）1400米

　　「軍士」跑完上場隔了大半個月至復課，但近兩個月工序完全冇「甩漏」，而大閘跟番嚟好順又貫注，早前單試亦有勢。以兩仗前能贏「永得勝」，喺度其實好惡。

「和牛」3歲仔加磅，壓力有幾大真係好難估計，尊重新勝，作配。

　　「聚好盈」及「愛拚者勝」，上場並非用上最佳跑法但追得好，呢場彼此排好位，可憧憬。「文武精神」好快需要再加程，因加磅後在此程未必有幾多分喺手。

第7場　三級賽（90分及以上）1000米

　　「金德寶」轉倉後喺性情上有唔同，明顯冇之前咁大波動，雖然唔知今日亮相時係咪一樣，起碼有得博。「蓮華生輝」短途王冇理由唔揀，何況今季直路賽未輸過。

　　「美猴王」與「錢照贏」，卡士與前兩駒梗有距離，惟同場可供選擇之馬已有限。「活力飛駒」剛賽太失望，但復課真係唔覺曳。

第8場　第三班（80-60分）1000米

　　「御鋒」同程打叠兩W，上場更造出佳速（今季第四快），如果唔係今場內檔起步跑線失利，仍有贏面。「延續美麗」及「領航人」，近仗同程表現出色，正路配腳。

　　「多益善」有速度，好大機會喺直路賽有更好發揮。「喜盈門」及「勝利旋峰」前仗此程得季殿，論賺蝕，後駒更要重視。

第9場　第三班（80-60分）1400米

　　「勝利駿駒」跑短200米，有可能比1600米衝得勁。「魔幻大師」早前大閘拍住「加州財子」返嚟，表現得有前有後，縱使耐冇出亦唔使擔心。

　　「八逢九紫」賺跑法及檔位形勢（季內此程1W1Q都係C+3欄）。

　　「豐衣足食」跑法在今場可能不利，除非多馬扯得快，先至利佢追。「雙龍出海」評分幾盡，係跑法可能賺多少，P望唔係冇。

馬會賽馬節目主持　洪禮賢