賠率有路捉：大有利蠢蠢欲動

魑魅魍魉

　　噚日好多場嘅飛數都順理成章，甚少有戰績同賠率唔成正比嘅馬，惟第九場「大有利」同第十場「滿綵」W飛有啲奇怪，如果今日又有冷馬出籠，可能係佢哋都唔定。

　　先講「大有利」，今季佢二月尾先出嚟參賽，跑咗三場都冇人睇好，最後賠率冷到好似從來冇入過三甲咁，個W徘徊喺六十七倍至九十一倍，當然跑出嚟個樣同飛數又幾啱比例，最叻係前仗六十七倍嗰個第八，但係呢隻馬噚日下晝一度得9.2倍，咩緣故呢？或者係同佢轉咗個配備有關，馬房今次除咗佢個眼罩，加番個羊毛面箍，好老實，幫助有幾大真係唔知，但係就佢上季能夠喺一班賽跑第五呢個績嚟睇，唔似跑兩季即刻腳軟嘅孱仔馬，今次隔夜飛咁勁，可能真係搏命，小注跟吓冇壞。

滿綵十倍W夠信心

　　第十場，大家可能會覺得「滿綵」情況唔同前駒，因為上仗起碼叫跑近，昨午一路十倍鬆啲好正常，但諗深一層，佢跑一哩未有好成績你睇，又唔好彩抽咗外檔，仲要同場高手雲集，獨贏得十個開其實已經好有信心，拖番一票好啲。

　　騎師王方面，韋達柏寶個賠率再次拋離其他對手。論到佢哋手馬，韋達坐騎的確會令佢得番15.5蚊，但柏寶啲馬唔算勁都拍得佢咁緊，得36個半，似係郁手，不妨試吓。

周仲