洪禮賢講馬：賽績硬淨佳同再贏

港陌

　　第六場三班1650米。「漂亮第一」近2仗唔理係田草定谷草，開始輸得唔遠，未至於陣上好有走勢，最起碼唔似得季內頭兩仗，輸親都一條街。講到較為吸引1場，要數上場谷草1800米，柏寶用咗唔係咁啱隻馬性能嘅放頭跑法，放到最後百餘米先至「立」咗腳，算係咁嘞！

　　今仗換人及轉路程，怕且會起到「阻嚇作用」，但計跑法、排檔等因素，佢好大機會係賺到嗰隻，除非湯智傑又用埋上手騎師嘅放頭戰略，如果唔係，內側「士多啤梨」及大外檔「國中之星」應會走先，佢喺2檔，好大機會做到沿路咬住2、3位，形勢及跑法最夾；如計埋評分，幾乎係全場最有分利1駒，唔期望贏得到，跑個P已經好分。

　　第七場三班1200米。「佳同」上賽喺加眼罩及縮程（初跑谷草1200米）情況下贏得第1W，嗰場跑二三名嘅「威威多星」和「輕輕鬆鬆」，之後排住隊贏晒，故此，締速只值季內三班中上，已夠指標性，加5磅再跑，喺三班仍然有幾大優勢。

　　另外，上場可反過來贏番接近1個身位，其實唔係易，因頭段原來慢至24.39秒（比同晚四班慢5線有多），佢拉士兩段有本事愈造愈快時間，變速力幾驚人。除非1場搏散咗就冇得好講，但喺早課睇佢試跑仍然喼到；繼續遇上一批唔叻對手，可再W。

馬會賽馬節目主持　洪禮賢