洪禮賢講馬：韋達單日唔多產 柏寶專打順境波

魑魅魍魉

　　三幾個月前嘅事，印象可能模糊咗，之但係，如果係近排發生嘅嘢，唔使篤電腦，都會記得到，想講嘅係近期賽事柏寶嘅趨向。我又唔認識佢，純粹1個旁觀者，1個普羅馬迷，點知佢嘅EQ有幾高？抗逆指數又有幾勁？落場跑係咪淨係識打順境波，開場一遇風浪就「立」手「立」腳。定係近期真係咁啱得咁翹，才會出現強烈對比。

　　喺近幾期賽事，柏寶一係W都唔W吓，該期任佢騎咩超級坐騎，捧到有幾熱嘅馬都好（如「蓮華生輝」和「佳同」），唔贏就唔贏。但一順開嗰期，有本事贏完1隻又1隻（4月17日谷戰連中三元，有2W係廿幾蚊馬）。總之，近排佢個trend就係咁。

　　講開單日連中三元呢個話題，韋達與柏寶目前喺騎師榜分列一二名，雖然前者頭馬次數幾乎多出廿場，不過，以單日狂數胡次數作比較（贏3場或以上），柏寶成績遠比韋達出色。開季到依家約莫跑咗8個月，韋達只係試過4期連中三元，平均2個月先得1次。而柏寶差唔多係佢1倍，單日贏3W已有6次，仲有1次係4W，拉勻嚟計，1個月梗有1次會嚟！如果知道佢哋兩個有咁嘅特性，唔好理嗰期賽事，究竟騎牛定騎馬，坐騎超唔超級，硬係要搵佢哋啲馬買獨贏過三關的話，中晒嘅機會率，捧柏寶冇咁渺茫噃。

馬會賽馬節目主持　洪禮賢