洪禮賢講馬：落班作賽手風順

港陌

　　第九場三班1600米。「天外之天」今季第3仗經已贏1600米，3歲仔早就證明過氣量，話就話嗰場贏得險，僅勝「高分貝」短頭（佢喺直路中段一度冇位上），又只係四班頭馬。要知道，佢出賽經驗唔多，當時仲要初跑此程（該場之前跑到氣管有痰），贏得到真係唔簡單，就算係有啲賺檔位之利，冇咁好「氣」，唔會辦得到。

　　由於翌仗進軍1800米失敗，之後便重回基本步，集中跑1400米，唔係冇再贏過，加分後跑3場，亦屢有表現，但總認為停留喺1400米，佢嘅發展空間會受局限。今場終於再試此程，賽前特登隔番一段日子，但期間做晒野，成套準備畫公仔畫出腸，擺埋個柏寶，更加「出」啦！

　　第十場二班1200米。「手風順」近兩仗1200米與「富貴金龍」互有勝負，唔去計大家狀態有冇起落，而讓磅由6磅拉闊至11磅，又係咪關鍵所在，主要係着眼於上場佢蝕住贏，過程有點不可思議，能力似乎1場堅過1場，所以，今仗降番二班跑，點都有so。

　　如果一加15磅會冇影響今場能力，講都唔會信，好就好在今場要撼嘅馬有限，「旺當家」1隻咁大把，最終撼唔贏唔意外，要保住一席位置，又應該唔難，尾場揀膽，料可勝任。

馬會賽馬節目主持　洪禮賢