棟悉先機：紅旗勇將隨時變身

港陌

　　快活谷馬場A跑道賽果往往比較正路，記憶中，最近幾期A欄賽事，大熱門馬贏咗唔少，每期總有三幾匹做到保衛者，呢點對於馬迷們嚟講絕對係好事，起碼唔使盲摸摸，有得跟，唔係爆到九彩，搞到度馬時毫無方向。

　　第四場四班1200米。「聚有盈」自從08年頭打開勝利之門，一等就3年，先至再有頭馬到手，喺度無意以成敗論英雄，因阿棟只會向前看！而睇隻馬真係勁，愈贏愈叻，回升四班不單只冇阻力，仲要贏到冇對手，以上場姿態而言，加10分根本已經算少，如果佢係後生仔，唔加12、13分至出奇。雖然今仗多負10磅會有影響，由於目前銳不可當，三連捷乃意料之內。

　　第五場三班1200米。「紅旗勇將」上場初出已作為重心，捧成大熱門卻不入前列，阿棟為呢匹馬要換眼鏡！敗後問番啲手足，究竟係咩一回事，據了解，隻馬原來唔識應付變化場地，所以，有時喺外地識跑黏軟地，唔代表喺香港都得。輸完之後，工夫冇放緩，睇嚟有心拼個明白，個人對此馬前景睇得幾好，如果今晚場地冇受影響，佢係龍係蛇，睇埋今鋪！

　　第六場三班1000米。「火燎腚」上場同程率先過終點，不過係無鞍上人。退出之後，硬性試大閘，試來有前有後，唔覺有問題。由於今場排2檔起步，而喺埋便係久不久會慢閘嘅「軍刀」，即係與1檔無異，如果畀佢搶到欄，114磅太輕了，隨時可放到。

點買法

　　「紅旗勇將」幾好前途，一定追埋今場，獨贏過關以佢及「聚有盈」作串射。而重心Q第四場感覺上最穩陣，有世界馬膽「聚有盈」在陣，睇嚟都係搵腳，拖１、２，買三重彩可考慮３、６及７。

資深評馬人　陳華棟