高清睇跑馬：薄荷糖有權添食

猪拉多纳

　　「薄荷糖」初出之役出戰田草1000米，全程殿後唔見影，拉士輕描淡寫已衝入亞軍，賽後小組更告誡柏寶，指其早段策騎此駒的方式已引起關注，應盡可能確保馬匹不會落後太遠。

　　往後三仗，「薄荷糖」全部跑入前四名，最誇張是每次均出戰不同路程，賽前仲要一課快跳都冇，擺明係恃質凌人。前仗出爭1400米得第四，已是成績最差一次，但睇番直路上全程被困，差不多過了百五米才望空，但也不過在窄位衝刺，最終輸給「勁力」不足一個馬位，表現其實甚搶鏡。

上仗蝕位照贏

　　上仗總場次574，「薄荷糖」增程跑1600米，起步後採用留前鬥後戰略，卻全程走三四叠蝕位，到最後二百米衝刺時，馬兒更外閃極不規矩，但最終仍能擒下一眾對手勝出，質素表露無遺。今次方嘉柏又安排此駒轉程，回師1400米以其質素必可應付，要添食冇難度。

　　另外，「嘉寶神駒」今季首三仗即取得兩冠一亞，雖然其後未能再添頭馬，但在陣上亦有不俗演出。前仗此駒出爭田草1600米，沿途走三叠蝕位，反而頭二馬「奪錶」及「大衛金剛」形勢比牠好得多，能入位已有交代。

　　上仗總場次535，「嘉寶神駒」以不足一乘輸給再出再贏的「暖在心頭」得第二，若非牠入直路時走出外檔蝕位極多，最終誰勝誰負仍是未知之數。今次續在五班上陣必具優勢，近戰亦證明1600米威力不遜1400米，同場對手實力平平，可睇高一線。

Sam