洪禮賢講馬：盡量尋找賽事漏洞 減省不必要注項

魑魅魍魉

　　由於賽馬玩意係持久性，過程中要盡量減少犯錯、剔除非必要注項、遠離群眾、尋找漏洞等等，係何等重要。每做啱1項，變相令命中機會增加，同時減低開支，長遠計，成本與利潤唔會愈來愈失衡，情況等於如果場場買，就算中得3幾場，亦未必補到本，「上半場」輸成皮嘢，臨尾連中3Q又點啫，場場Q派過千都抵唔番條大數。

　　尋找漏洞，之所以重要，最終未必係幫到我們贏錢，某程度上，係避免踩中「地雷」。記得有晚谷草夜賽跑B欄（16/3），頭7場賽事（1000至 1650米），冇1場連贏位嗰兩匹馬，排檔唔喺2至6檔之內，如是者，攤路跑到尾場先至爆煲（8及9檔馬串Q）。如果當晚順應潮流，就算較早場次未醒覺，中間幾場起碼喺投X上，唔應該再揀嗰個範圍以外嘅馬，從而減省不必要注項，令當晚成本唔會無端端多一截！

　　又例如最近1期新馬賽，喺敝報賽後版，已經道出有咩必勝方法，當然，一切方法係事後孔明，因位置賠率唔係fix odds，有乜「依郁」，回報與預期未會相符，賽後版純粹係喺派彩賠率作投X假設，搵出注項「鋪」得好，可鎖定某個百分點嘅盈餘。

　　但呢類場合往後可仍會出現，如計啱數，注項大細分布得宜，亦好有機會立於不敗之地。

馬會賽馬節目主持　洪禮賢