里爾射手出關乘聖爭盃

港陌

14/05/2011
文： 牛奶仔

今晚法國足總盃決賽，法甲榜首里爾會同上屆冠軍巴黎聖日耳門爭冠，里爾喺聯賽有失分餘地，今場定必全力爭勝，加上有次席射手謝雲奴回歸，平手盤抵博。（now714台周日凌晨2:45直播）




呢場法總決賽會喺中立場巴黎法國球場上演，呢次係里爾自1955年以嚟首次殺入決賽，呢支法總5屆冠軍依家喺聯賽領先次席嘅馬賽4分，排緊榜首，因此都仲有失分空間，相信佢哋今仗定必全力爭勝，務求重奪失落56年嘅冠軍，並向今季「雙冠王」邁進一步。


聖日耳門留力聯賽


里爾上場作客反勝聖伊天後3連勝，士氣同狀態都如日中天，該仗停賽嘅射手謝雲奴今場仲可以復出攻堅，大大增強數胡能力，地利輸蝕少少都唔怕。




另邊廂，巴黎聖日耳門雖然保持連續8場不敗，不過佢哋近2場比賽都贏唔到，今場仲有前鋒盧恩杜拉因傷缺陣，鋒力受損。再講，佢哋依家喺聯賽落後第3位嘅里昂1分，因此仲要搏命以爭取來屆歐聯席位，隨時會放棄法總呢個雞肋盃仔，里爾平手盤唔怕捧。




法總賽制：決賽以一場定勝負，打和需加時作賽，再和則互射12碼決勝。