慕遜加柏贏波冇難度

猪拉多纳

19/05/2011
文： 走肖

今年2月14日情人節，慕遜加柏邀請法夫爾領軍救亡，前季佢帶領哈化柏林得到德甲第4名，執教能力備受讚賞，結果佢上任後，主場6戰有5勝1負，成功為慕遜加柏搵到護級曙光。唔好以為法夫爾符碌，實情佢嘅主場手下敗將，包括冠軍多蒙特同名牌史浩克04，惡得咁交關，呢場爭護級點會唔搏命？


慕遜加柏近4場3勝


仲有呀，今季攻入7個聯賽入球，養傷超過兩個月嘅慕遜加柏射手迪甘馬高，日前喺德甲煞科戰終於復出，後備上陣16分鐘，加上臨近季尾，前鋒艾迪素、中場馬高列奧斯、箭頭漢基同王牌艾蘭高輪流發威有波入，帶挈球隊近4場有3勝1和，簡直好似連個天都想佢哋護級成功，咁嘅情況自然要繼續撐。


波琴攻守不穩


相反，波琴嘅北韓射手鄭大世仲未好番，就算最近喺德乙3連勝，當中每場攻入3球都信唔過，講到底，近期波琴要由中場出身嘅馬簡艾甸打單箭頭，雖然佢入球效率係唔錯，但要打硬仗嘅話，始終唔係適當人選，而且波琴近6場得兩次保持清白，防線算唔上硬淨，作客出事絕對唔出奇。