借題發揮：姚本輝食三寶

港陌

　　周日新加坡那邊有兩項G1上演，新航盃及KrisFlyer國際短途錦標，香港都有派馬去跑，遠征成唔成功，有好多因素在內，港隊馬唔係冇可能捧晒兩盃，尤其在新航盃那場，其他好多參賽馬實力平平凡凡，假使「加州萬里」及「魔法幻影」去到當地適應得好，唔應該冇得揮，嘩，1隻係金盃盟主，另1匹係香港盃亞軍，構成連贏唔係意外。

　　反而，另一場短途錦標比較棘手，雖然「蓮華生輝」及「綠色駿威」曾經贏過主隊「火箭人」，此一時，彼一時，對方正處黃金期，係咪可再畀兩駒恰到，未必了。不過，「蓮華生輝」今場換人，或可帶來新衝擊，人同此心，薄奇能可能係一次過交易，邊會唔醒醒定定。

　　講開「蓮華生輝」，又唔可以唔提姚本輝，今期沙田賽期大陣仗，14駒出迎，大馬房出馬多，本來係司空見慣，但多成咁，以近期姚廐出馬量而言，並不常見，有3場更以馬海戰術出擊，冇心食大茶飯，打死都唔信。

豐衣足食夠分量

　　姚廐馬中，尾3場嘅「千江映月」、「豐衣足食」和「戶外名駒」較合心水，前兩駒今季未交代，嚟到季尾唔會冇鬥志，而兩駒實力在三班唔會被比下去。「戶外名駒」降到二班實力超級，唔需要負重，更加有利。咁計法，姚廐三寶真係有行噃。

Jack