巴塞曼聯驚世賭局

港陌

28/05/2011


周日凌晨歐聯決賽全球矚目，當今球壇兩大王者曼聯及巴塞隆拿，將決戰溫布萊爭做歐洲盟主！今場決賽星光熠熠，球員粒粒皆星，單單一個美斯已值接近1.4億歐元（約16億港元）；而兩軍正選加埋總身價，更高達6.6億歐元（約73億港元）。兩軍金鑽廿二人要稱王稱霸，今仗背負一個神聖任務，就係要解開溫布萊這座「足球聖殿」嘅「神秘密碼」！（有線61及201台周日凌晨2時45分直播）




根據Frontier Economics調查公司資料，歐聯決賽雙方正選球員總身價高達6.6億歐元，而巴塞正選十一人身價總和為4.535億歐元，而曼聯方面則為2.069億歐元。廿二人當中，當然以美斯最值錢，身價約1.398億歐元，而朗尼則是「紅魔鬼」之冠，約值5,930萬歐元（約6億6千萬港元）。路爾斯華倫西亞身價於曼聯僅排於朗尼之後，約值2,670萬歐元（約3億港元），但恩尼斯達、沙維、碧基、佩奧爾、布斯基斯、韋拿及柏度洛迪古斯，身價都高於路爾斯華倫西亞，故巴塞正選球員總身價，高過曼聯超過一倍。




稱溫布萊球場為「足球聖殿」，絕無誇大其辭。舊溫布萊早於1923年成立，曾舉行五次歐聯決賽，係全球其中一個最著名球場。曼聯老將傑斯，就直接稱之為「現代足球搖籃」。而於該五場決賽中，曼聯及利物浦分別於1968同1978年打入決賽，最後都奪標而回，溫布萊可謂英格蘭球隊福地。不過1992年巴塞亦曾於同一場地，打敗森多利亞捧起大耳朵盃。


「聖殿密碼」露玄機


每屆歐聯都預先公布決賽比賽場地，而於歷史上，一共有十支球隊能於自己國土上爭標，其中七隊成功封王，除曼聯、利物浦外，仲包括皇馬、國米、阿積士、祖雲達斯同多蒙特；而三支「失敗者」中，咁啱包括巴塞隆拿，1986年佢哋於西班牙不敵布加勒斯特星隊，而另外兩隊，分別係蘭斯同羅馬。




曼聯於今次決賽好似攞到甜頭，但其實自2007年新溫布萊球場重開後，曼聯曾於該場地比賽九次，只於去年喺英聯盃決賽及社區盾贏過波，其餘七戰五和二負；如撇除四場社區盾賽事，其餘五場曼聯僅得一勝，最慘係有四場冇波入。「紅魔鬼」雖然對溫布萊極為熟悉，今次決賽亦有多達三萬五千球迷入場打氣，比巴塞多約一萬五千粉絲，但亦未必能於大批江東父老面前揚威。


巴塞懸紅2億多一倍


巴塞賽前出巨額獎金1,600萬鎊（約2億港元）鼓勵球隊爭標，如平均除開，每名球員奪標獎金高達65萬鎊（約831萬港元），比曼聯「雙冠」獎金多一倍。而有傳巴塞係按球員重要性分發獎金，故如巴塞稱王，主力如美斯等，應分到過百萬鎊獎金。根據英國一大學調查，邊隊奪標，各方面經濟收益將高達1.26億鎊（約16億港元），亞軍則約有7,300萬鎊（約9.3億港元）。

歐聯官方最佳陣容

雲達沙（曼聯）

達里祖史拉（薩克達）

碧基（巴塞）

尼曼查維迪（曼聯）

馬些路（皇馬）

奧斯爾（皇馬）

恩尼斯達（巴塞）

加里夫巴利（熱刺）

傑斯（曼聯）

美斯（巴塞）

魯爾（史浩克）