德國烏拉圭重演世盃季軍翻版大戰

猪拉多纳

29/05/2011
文： Mic少

今晚國際熱身賽上演南非世界盃季軍戰翻版，德國主場鬥烏拉圭，兩軍皆擅攻，德國踢法豪邁，擁有應屆德甲神射手馬里奧高美斯及世界盃「士哥王」湯馬士梅拿助陣，火力強勁，烏拉圭鋒線鐵三角科蘭、卡雲尼及蘇亞雷斯亦屬世界級，加上熱身賽場合冇壓力，預咗雙方會駁火鬥攻，首選入球大。（無綫翡翠台周一凌晨2時直播）




德國近年無論大小賽事都大踢進攻足球，其中一個原因係球隊年輕，主帥勒夫及球員都屬於少壯派，戰術思維與踢法自然傾向進取。今次大軍名單只有前鋒高路斯及後衞費特列治超過30歲，其餘球員大部分都係25歲或以下，夠晒活力。馬里奧高美斯季尾腳風極順，最後5場聯賽射入9球，相信勇態可延續。雖然中場舒韋恩史迪加因傷退隊，但仲有奧斯爾校炮，此子於今季西甲表現大熟大勇，傳射俱佳，中場實力依然強大。德國下月初歐國盃外圍賽對手只係「細佬」奧地利，威脅不大，今場毋須特別留力。


兩軍交鋒例多波入


烏拉圭方面，雖然科蘭今季狀態回落，但卡雲尼及蘇亞雷斯演出光芒四射，前者於意甲為拿玻里射入26球，後者加盟利物浦後級數大升呢，以兩人射術，攻破德國大門並非難事。事實上，兩軍過去交手，往往大手交易，如近3次對賽，總入球都達5球，包括上年世界盃季軍戰，德國贏3比2。烏拉圭為報一箭之仇，作客都唔會縮，1.75倍入球大值博。