李忠成復出三箭脫鹿角

猪拉多纳

29/05/2011
文： 吉拿甸奴

當你得唔到信任，就好容易失方寸同信心，廣島三箭今晚喺日職主場對鹿島鹿角，平手撐得過，因為鹿角喺亞冠盃慘敗出局後，負責羅致球員嘅強化部長鈴木滿開咗個危機會議，矛頭直指教練奧利華拉同隊長小笠原滿男，言談間質疑佢哋過時，三箭有射手李忠成復出抵捧。（now633台周日晚6:00直播）


鹿角教頭用人不當


起初以為，鹿角受到東日本地震影響練習，表現至比較慢熱，但其實防線不穩至係佢哋致命傷，近8場得1次保持不失唔在講，期間贏過嘅福岡黃蜂、FC上海同FC悉尼，實力都係明顯差過佢哋，日前鹿角喺亞冠盃16強作客FC首爾，即刻潰不成軍淨吞3蛋，日職最強招牌幾乎冧檔！




日前鹿角強化部長鈴木滿召開危機會議，討論班波係咪需要進行大改革，佢認為教練奧利華拉用人有問題，高價收購嘅利亞拿中鋒卡路士施華成日做後備，又暗示隊長小笠原滿男作用下降，隊波應該畀新球員上位咁話，相信奧利華拉同小笠原滿男個心會好難受，仲邊有心機搏？




另一方面，三箭上周作客以0:1不敵神戶勝利船，開季後連續6場不敗走勢斷纜，輸波主要原因係開季攻入4球嘅射手李忠成停賽，今場佢可以復出，拍住隊長佐藤壽人唔憂冇波入，即使有中場青山敏弘、高柳一成同水本裕貴養傷都唔怕，平手值得睇高。