德國恰慣奧地利

魑魅魍魉

03/06/2011
文： 蘇斯黑柴

歐國盃外圍賽A組同日另一仗係奧地利於維也納主場鬥德國，德國無論實力、狀態及往績都佔壓倒性優勢，加上兩軍熟路到暈，奧地利冇條件偷雞，一於捧德國「讓球客勝」。（周六凌晨2時30分開賽）




德國目前五戰全勝位列A組榜首，冇人懷疑佢哋首名出線資格，尤其對住鄰國奧地利，對手一舉一動都逃唔過德國耳目，德國領隊勒夫過去曾經帶領過奧地利球會恩斯布魯克贏過聯賽冠軍，奧地利陣中多名主力包括普特爾、基斯甸富治斯、阿拉巴同夏歷都喺德甲効力，所以德國對親奧地利都佔盡上風，近四次作客去到維也納全勝，共入十二球只失兩球，往績一面倒。


奧地利殘陣4連敗


奧地利兩名德甲兵阿拿奧杜域及艾雲舒捷斯分別因受傷同狀態問題無緣披甲，主力門將馬曹因傷缺陣，要起用從未代表過國家隊嘅廿九歲門將漢斯貝加把關，整體戰鬥力進一步削弱。




德國方面，箭頭高路斯、中場德拉舒同馬高列奧斯因傷退隊，中場基迪拉同路菲斯因傷上陣成疑，但反而迫使勒夫排出更具攻擊性陣容，作客福地力足大炒近期國際賽四連敗嘅奧地利。