葡萄牙地頭擺陣「主勝」 攞威

港陌

04/06/2011
文： 亨格比利

一隊波再好人腳，冇一位好主帥掌舵都只係徒然。自從保羅賓圖接掌葡萄牙之後，成班波就好似脫胎換骨一樣，今晚佢哋喺歐國盃外圍賽H組面對挪威，陣中王牌基斯坦奴朗拿度講明要攞威一洗烏氣，一於捧2.05倍「讓主」。（有線61、64及155、中央5台周日凌晨4:00直播）




本身畀奎雷斯教到死氣沉沉嘅葡萄牙，自上年9月由保羅賓圖揸旗之後，即刻喺歐國外連贏丹麥同冰島3:1，跟手仲喺熱身賽大炒西班牙4蛋添，證明呢位教頭有料到。睇番H組形勢，葡萄牙揸住7分排第2，今鋪喺里斯本出擊當然想報番首循環輸1:2嘅仇。


挪威狀態士氣都唔掂


皇馬今季畀巴塞食住，連環失落西甲同歐聯錦標，C朗最近仲畀葡萄牙傳媒踢爆佢喺集訓期間蒲夜店，唔氣頂就假咯！呢位葡萄牙隊長賽前揚言今季任務未完成，放暑假前點都要砌低挪威爭做小組「一哥」，以佢今季為皇馬上陣54場入53球嘅強勢，拍住曼聯翼鋒拿尼同協助波圖成就4冠王嘅摩天奴攻堅，火力唔講得笑。




對家挪威小組4戰保持不敗，今次當然希望繼2000年歐國盃之後再次躋身大型決賽周，之不過亨格比利就對呢班波冇乜信心嘞！事關兩大主將摩頓柏達臣同卡維都因狀態欠佳，季尾分別喺所屬球會失去正選，効力雷恩嘅中場堤迪就因為大腿傷缺陣，門將查斯甸喺挪超又失波失到暈，前中後三線都畀唔到人信心。加上名帥蘇巴根早排突然毀約，唔肯喺歐國盃決賽周舉行之前接掌帥印，狀態、士氣都咁麻麻，仲可以有乜期望吖？


葡萄牙火力冠H組


‧歷來9遇挪威獲6勝2和1負。




‧火力冠絕H組，4戰攻入10球。

挪威近戰失波多

‧近8場國際賽有7場開入球單。

‧最近5場國際賽場場有失波。