贏錢心德：紅鑽收起箭頭唔慌多波入

猪拉多纳

05/06/2011
文： 走肖

受到東日本地震影響，日聯盃分組賽改為兩回合淘汰賽。浦和紅鑽今日喺第一圈首回合主場對山形山神，玩1.65倍入球細最實際。紅鑽已連續6場不勝，賽前仲有消息話佢哋會收起最有突破能力嘅原口元氣，火力難免下降，今仗睇怕都唔慌多波入。（開賽時間：周日下午2:00）




今季紅鑽再換教練，點知戰績仲衰過之前，近6場得3和3負聯賽排第14位。日聯盃博翻身？未必喎，近3屆紅鑽有2次分組賽出局，08年得2和4負未贏過，而且紅鑽現時聯賽大過天，報道話原口元氣有啲傷今場多數唔踢，證明紅鑽唔重視日聯盃，就算射手田中達也傷愈都好難開入球騷。


山神8場聯賽5場交白卷


雖然紅鑽有中堅史柏拉洛域入選澳洲國家隊，影響防守力，但山神今季聯賽8戰竟有5場冇波入，證明開季前射手田代有三同中場增田誓志借用期滿重返鹿島鹿角，對佢哋嘅攻擊力造成重大打擊，再加上前線最有級數嘅北村知隆養緊傷，睇怕都係悶戰一場。




賽制：採主客兩回合淘汰制，今輪為第一圈首回合，若總比數相同，作客入球較多一隊晉級，再和則於次回合後加時作賽。若加時入球數字相同，客隊可憑作客入球優惠晉級，若加時沒有入球，則需互射12碼決勝。