美國掃清楓葉攞威

魑魅魍魉

07/06/2011
文： 朱楓

失敗乃成功之母！雖然美國日前喺熱身賽大敗，但領隊巴特利賽後話班球員正好上咗寶貴一課，相信聽朝喺美洲金盃C組首戰，响底特律對住加拿大一定唔敢輕敵，預計喺有埋射手當路雲復出，可輕取仍三心兩意嘅「楓葉國」，「讓球主勝」有1.9倍值博！（now634台周三早上8:00直播）




美國日前喺主場約戰西班牙，為留力美洲金盃，領隊巴特利大派年輕球員上陣，最後大敗0:4，錄得自09年金盃決賽不敵墨西哥0:5後最大敗仗。不過巴特利賽後反而話係好事，等球員知道自己嘅不足，嚟緊喺決賽周將功補過。


加拿大未諗掂點排陣


其實美國喺美洲金盃一向無敵，特別喺小組賽，由91年至今，只係和過2場咁大把，其餘全部贏晒，例牌首名出線，可以話贏到盲目晒，大敗畀西班牙真係起到好大警惕作用，預計有番上場對西班牙因病冇披甲嘅首席射手當路雲、保卡尼加，同埋半場先後備入替嘅丹普西及米高巴特利，必大打爭氣波洩憤。




加拿大喺美洲金盃一向戰績唔錯，曾經喺85同00年奪標，近排狀態亦唔錯，對上5場獲2勝2和1負，今次大軍更有多位海外主力回歸，好似有哈化柏林前鋒費恩特同般尼後防大衞艾格等，不過領隊史提芬赫特賽前竟暗示唔知應該用名氣定狀態嚟排陣，當中老牌門將夏舒菲特事隔8年後再打金盃，假如今場真係做正選，隨時成為計時炸彈。