中國撼北韓細均力敵

港陌

08/06/2011
文： 蘇豪

中國今晚於貴陽與北韓拍跳，國足上場擊敗烏茲別克演出唔曳，不過大軍前線鋒力偏弱問題仍未解決，今場讓波信唔過。北韓缺少王牌前鋒鄭大世，但勝在防守硬淨，兩軍同樣守強攻弱，一於熱捧細盤！ （中央5台周三晚7時35分直播）




中國上場同烏茲別克交手，教練高洪波安排中場鄭智串演前鋒，並於前線輪住同進攻主力鄧卓翔移形換影，效果唔錯，但兩人把握力麻麻，未能將機會轉化成入球，國足最終憑箭頭郜林上陣士哥小勝。「高家軍」防守唔差，衰在進攻乏力，今次遇上北韓讓波實在難靠。


鄭大世缺陣削攻力


北韓踢法向來簡單，先專注做好防務，再由王牌前鋒鄭大世於前線搵食。不過，鄭大世今次並冇入選大軍，官方指此子受傷休戰，缺少呢位球星衝鋒陷陣，球隊攻力弱上加弱。另外，老將志尹南曾於去年世盃對巴西射入一球，今場亦不在陣中，令側擊力大減。




北韓近三場亞挑盃全勝，而且保持不失，但對手只屬斯里蘭卡、尼泊爾及阿富汗等次級球隊，今次作客中國相信會受到真正考驗，球隊勢必全力施「守」術，預計兩軍冇乜交收，莊家低開細盤賠率，飛數似樣，捧細！