荷蘭老鼠拉「圭」玩個細

港陌

08/06/2011
文： 走肖

唔齊人仲要玩輪換，想入波真係唔容易。烏拉圭今晚喺熱身賽主場對荷蘭，建議玩入球細，雖然兩隊喺南非世盃4強開大騷，當時激戰後烏拉圭僅輸2:3，但今次荷蘭有兩部發電機雲達華治同史奈達缺陣，領隊雲馬維克仲可能收起埋射手尹佩斯，火力大減1.7倍入球細有得諗。（廣東體育周四凌晨2:30直播）




烏拉圭喺啱啱周末強陣同德國硬撼，結果完場前失守輸1:2，根據報道，呢場烏拉圭會用番上場波嘅班底出擊，意味3大射手科蘭、蘇亞雷斯同卡雲尼會繼續打正選，表面睇火力應該有保證，但問題係今季科蘭同蘇亞雷斯喺球會入球數字大減，淨係靠意甲射手榜第2位嘅卡雲尼孭飛，前線好難有斬獲。


史奈達雲達華治缺陣


對家荷蘭方面，由於首席門將史基倫堡受傷，佢哋上周六喺熱身賽對巴西，要安排首次入選嘅紐卡素守門員告魯爾把關，雖然睇落有啲牙煙，好在最後佢都保持清白完場，加上領隊雲馬維克對住實力較強嘅對手，多數會吩咐球員踢得保守啲，今場再遇烏拉圭，未必再有咁多入波睇。




事實上，荷蘭中場最有創造力嘅雲達華治同史奈達，因為有傷冇入選今次大軍，全隊組織力難免下降，而且教練雲馬維克賽前放風話，打算安排做慣後備嘅前鋒亨特拉爾、中場艾利亞同後衞保馬今場正選出戰烏拉圭，即係話唔使旨意荷蘭派最強陣出擊，包括尹佩斯在內嘅主力都可能被收起，真係唔好旨意佢開大。