波蘭發電機倒戈劏雞

猪拉多纳

09/06/2011
文： 朱楓

今晚法國作客波蘭踢熱身賽，唔似W得！事關波蘭今晚繼續留守華沙比賽，可謂以逸待勞，加上仲有主力奧拜尼亞克復出「倒戈」，對住或因兵疲作出大輪換嘅「公雞」，朱楓認為波蘭至少可以保持不敗，開出1.62倍「讓球主勝」！(有線61及64周五凌晨3:00直播)




波蘭日前喺華沙踢熱身賽，雖然對手只係「阿根廷二隊」，但最後都贏2:1，總算為領隊史梅達減輕唔少下台壓力。今晚波蘭原本會改喺格但斯克同法國踢熱身賽，點知當地球場因未起好要延遲開幕，結果波蘭要臨時改番喺華沙踢，雖然聽落幾瘀，但如果實際啲諗，球員就免受舟車勞頓之苦，都唔係一件壞事。


新任爹哋奧拜尼亞克復出


更何況波蘭呢場仲有奧拜尼亞克復出，呢位中場本來喺法國出世，但因為唔受重用，結果09年「變節」，至今為波蘭上陣15次已射入4球，表現唔曳。上場對阿根廷，奧拜尼亞克因為老婆臨盆缺陣，但老婆一生完個女後佢就即刻歸隊，仲話明好期待首次倒戈，睇得出佢好想喺法國隊面前證明自己，波蘭有佢落力喺中場穿針引線，肯定事半功倍。




繼歐國盃外圍賽作客逼和白俄羅斯1:1後，法國日前又作客烏克蘭踢熱身賽，雖然球隊最後大勝4:1，但有3個入波係喺下半場87分鐘後先取得，然而法國賽後勁開心，仲吹捧梅開二度嘅中場馬雲馬田為新施丹、小沙維，但朱楓相信佢哋今晚作客波蘭先見真章，因呢場係法國近7日內踢嘅第3場作客比賽，預計將會作出大輪換，喺默契欠奉下，睇嚟馬雲馬田今鋪識飛都難幫法國贏波！