洪禮賢講馬：新力多健康藍莓俊威威飛魚駿王 新希望一路順風自由萬歲逸逸友福

魑魅魍魉

　　季尾賽事，馬匹跑得好唔好，除了體力以外，賽事形勢有着很大影響，正如今日跑跑吓馬有雨的話，擺前走將會何其有利呢。

重心場次：第8場　第三班（80-60分）1600米草地

　　「新希望」經常輸少少返嚟，根本與實力無大關連，今仗1檔而好大機會遇到慢步速，或可贏番場。

　　「一路順風」慢地造靚時間贏，打水戰有幾叻，已經表現晒出嚟，如跑變化地，機會更可能在前駒之上。

　　「逸逸友福」與「太平星」，在總場次617對過，前駒蝕晒仍跑贏，所以，呢場排衰位仍看好。「自由萬歲」贏完尚有P，證明贏馬加分後唔使等消化，如處境不如上場般差（中途勒避及失位），恃輕磅有得鬥。「傳奇快車」頭段唔快，幾難交出十成功力。「傲闖」初出八成馬左右，考考質地。　

第1場：新馬1000米草地

　　「好利佳」加罩試閘交得出唔錯前速，嚴格嚟講則擔心落場跑埋唔到尾，且看級數究竟有幾犀利。

　　「永旺家」初出內閃，上場陣上好咗幾多，但被彈甩嘅第三名水準，今場唔覺贏得晒。「華美之星」試閘走起上嚟步幅大及得個檻字，不過天生速度幾好。「履皇朝」縮程更加遲撻着。

第2場：第四班（60-40分）1000米草地

　　「黃金年代」試大閘好，落場一樣掂，輸畀「父子兵」入Q，賽績喺今場夠晒用。「金添多彩」縮程及加罩，兩項轉變有針對性，可能有大幅進展。

　　「好辣椒」以之前上名水準，在今場負120磅，兼且跑線有利，有半冷機會。「麗晶之星」速度可靠但卡士低，係因主動跑法至揀。「龍船快」現階段一係加程，再唔係就泥地才有把握。

第3場：第五班（40-10分）1400米草地

　　「嘻哈大少」及「駿馬飛騰」早前同場跑過，前駒名次較好，但後駒拉士走勢反而更吸引，但點都好，呢對馬喺度已好惡。

　　「森淼盛」及「強駒」，剛賽分獲二三名嘅水準稍有疑問。「又贏晒」上場全程處三叠，跑輸正常，惟以佢前仗四班輸近表現，今仗有1檔，有權唔同晒。「天子駕六」與「朝東之星」，一對降班馬有質，前駒上場有痰退出，如冇陰影，實夠跑；後駒係擔心銳氣過咗。

第4場：第四班（65-40分）1800米泥地

　　「新力多」上場跑得唔好，人馬皆有責任。轉場幫唔幫到係未知之數，加程則正面，如小吳處理自自然然，擺前走可帶到。

　　「健康藍莓」2檔而畀佢放出，又或是守到前列，其實要喺直路過佢好難。「飛魚駿王」一哩都係追唔切，嘗試跑長啲，改跑1800米合理。「乘風破浪」跑咗兩場好差賽事，純因草地賽 ？！略有顧慮。「俊威威」輕輕唞過，之後總算做番晒該有程序，或又會返嚟。

第5場：第四班（60-40分）1600米草地

　　「勁加勁」加程至1600米、改變跑法、放得唔慢，一樣贏到，加6分有賺。「金玉之光」假設騎者跑過1場，略有領悟，加上跑番此程及排中檔，競爭力應比前強。

　　「信賴」好位隨時交到四班夠贏水平。「領彩」愈來愈現形，肯再跑長啲係好事。「危險英駿」與「奪錶」跑法上略失利。

第6場：第四班（60-40分）1400米草地

　　「寶德」7檔起步，希望唔使再因外檔打亂跑法，只要騎者喺留放方面做得足，有望出頭。

　　「桂花飄香」和「香檳歲月」，跑法上會比唔少對手有利。「幸運勇士」唔係直路攞位遲，上場可能有P，寄望今場內檔唔係害咗佢。「般若」加配件喺上場見功效，小心。

第7場：第三班（80-60分）1000米草地

　　「鷹之團」在冇可能位置贏到，上場難度分爆晒燈，雖然要讓「熊英雄」好多磅，仍未必輸蝕。後駒插班初出卻有多10磅減，106磅好使好用，壓力進一步減少。

　　「喜盈門」係咁上下料子，睇吓放到邊度停。「紅旗勇將」轉到直路賽，唔使顧咁多嘢，或有幫助。「明海光輝」此程初跑，但本身條件則可應付。「尚駿心」剛賽一再被夾，跑輸其實唔使介意。

第9場：第三班（80-60分）1200米泥地

　　「肥仔糖」此程早有根據，賽前又唔係唔操得，唞夠則有強大體力，目標明確，休出即搏。「延續美麗」如泥地好，或可放到。「勁飛駿」唔係10檔，爭勝力不會比前兩駒差。

　　「清新空氣」上場之敗，未知係咪前仗氣管有血的後遺症，希望隔多咗場，會有唔同表現。「明達」如果有泥地性能，轉場及加程會大幅增強實力。「心歡笑」係擔心級數稍不如。

第10場：第二班（100-80分）1400米草地

　　「喜惑」太準，尤其上場負重、初跑此程及冇賽事形勢照贏，初上三班都未驚過。

　　「一定爆」此程得唔得，未跑過唔知，計穩健程度當不及前駒。「好友福」降班對手與近仗係兩回事，唔係地慢，直路佢有行。「龍城動力」及「超群名駒」，前駒跑法主動及磅輕，喺今場啱夾；後駒上場跑到被抽秤，係怕要「落台」需時，惟前仗含蓄下仍追得好係有眼見。「超群如意」勝在準，正路腳。