艾簡達拿寸幼獅係二打六

猪拉多纳

12/06/2011


今晚英西合演U21歐國盃冠軍前哨戰，「迷你鬥牛軍」中場堤亞高艾簡達拿賽前無啦啦寸一眾幼獅，話佢哋係無名小卒冇個掂，英格蘭新星馬克艾拜頓梗係嬲到震啦！佢仲即時反擊，話艾簡達拿卒仔扮球星，未開波火藥味已經咁濃，睇怕今晚會有好戲上演！


艾拜頓反擊：今晚你就知！


英格蘭同西班牙被譽為今屆U21歐國盃爭標大熱，皆因兩隊球星如雲，不過「迷你鬥牛軍」中場、盛傳將由巴塞轉會到阿仙奴嘅堤亞高艾簡達拿，賽前竟然未學行先學走，扮晒球星辣火頭，寸「英幼獅」成隊都係無名小卒：「英格蘭？我淨係聽過韋舒亞同米卡李察士，不過佢兩位老兄今次都缺陣，對我哋好有利囉，點解？因為我哋真係未聽過其餘球員嘅名！」




無端端被人當臭四，英格蘭U21中場馬克艾拜頓慶過辣雞，立即透過傳媒進行反擊，話艾簡達拿淨係識講廢話：「真係好笑，我哋夠唔知邊個係堤亞高艾簡達拿咯！」




雙星罵戰仲未完，對於艾簡達拿話西班牙表現較英格蘭好，馬克艾拜頓就反駁話要踢過先知：「我睇過佢哋（西班牙U21）好多錄影帶，哈哈！我發覺佢哋後防勁唔掂囉，今晚佢哋就知死！」