鹿島返屋企搵甲府祭旗

魑魅魍魉

15/06/2011
文： 九叔

雖然要慳電唔開咁多燈，但係今晚始終係鹿島鹿角三個幾月嚟，第一次返主場縣立鹿島足球場打波，實會加多兩錢肉緊，客軍甲府風林呢勻有難嘞。（開賽時間：周三晚6:00）




自從3月11號東日本大地震發生之後，鹿島鹿角因為主場損毀嚴重，搞到無家可歸，幾個月嚟流離失所，踢過嘅所謂主場賽事，都只係借用嘅東京國立競技場，近4場日職仲係全部要作客嘅添，變咗一班浪人。今晚就好喇，個場修葺好咗，鹿島終於可以主場出擊，所以班人都好振奮，尋日仲猛練射波，擺明想搵甲府嚟祭旗。


調低泛光燈亮度節能


由於日本因為核電災難要節能，今日9場日職入面嘅8場夜波，都要推行節能措施，譬如運動場室內冷氣溫度調高，可以唔開嘅燈就唔開，上半場球場只開一半泛光燈，下半場至開足，不過光度都會調低，由平均每場1,500勒克斯，降到1,000勒克斯左右，呢個光度其實同香港個大球場差唔多。雖則個場會暗過以前，但係鹿島球員要適應唔難，事關佢哋始終係地膽。




何況由往績去睇，鹿島近四次主場打甲府，攞到2勝1和1負，明顯佔咗上風。當然，鹿島前鋒大迫勇也去咗日本U22國家隊報到，備戰奧運外圍賽鬥科威特，鹿島前線調動少咗一個選擇，但係甲府何嘗又唔係冇咗件U22後衞吉田豐呢？而且鹿島個箭頭興梠慎三、出擊後衞岩政大樹季初腳風都好順，夠晒條件砌低甲府開個1.42倍主W。