洪禮賢講馬:審時度勢成功關鍵

猪拉多纳

　　當機立斷，唔應該冇衝動成分在內？！事前機關算盡又如何，嗰刻係唔就，識變戲法亦冇用。right time & right place的確係老土，但唔信邪咩？自己撞埋去，冇人會伸出同情之手。

　　審時度勢嘛，未至於係個人座右銘，不過，呢套我會buy，硬着頭皮去衝，焦頭爛額有之。何不順勢而行，或者係成功關鍵，太執着，又冇獎，唔係話堅持己見有唔妥，總要顧及大局啊。

　　記得6月中有期B欄谷戰，頭場跑出11檔「王者先鋒」，隻馬係點贏呢？大有劃破地域感覺，完完全全當B欄偏差冇到（頭兩段唔算偏快），末段喺大外檔冚過晒對手，貼欄有賺嘅「生豪」、「好妙星」，鞍上人未嚟得切望出便，已經畀人過咗。

　　但跑完頭場，其他場次又似番典型B欄模式，至少有3場係由1至4檔馬包Q，此外，尚有「金威神童」、「沙紙」及「此時此刻」，係沿路跟喺二三位贏嘅頭馬。

　　之不過，又唔係冇類似「王者先鋒」嘅頭馬再出現，當晚第四場「紅日」，正正係以相同姿態勝出（排12檔）。所以，臨場有時幾互動，要執生，錯咗，咪改正囉。

洪禮賢