拜仁強戰蘇黎細

猪拉多纳

17/08/2011
文： 樂比堅尼

歐聯外圍賽附加賽首回合繼續上演，重頭戲係拜仁慕尼黑主場對蘇黎世，誓打2.2億歐聯金蛋保衞戰。拜仁今季改由老帥軒歷基斯執教，明顯以穩陣行先，兩場聯賽僅入一粒，已證明拜仁今季不求悅目，只求捧盃嘅目標。瑞士蘇黎世自知實力不及對手，首回合肯定死守，拜仁要大勝有難度，中位數調高至3.5球，建議向細盤入手。




（有線61及201台周四凌晨2時45分直播）


軒歷基斯「守」術大改造


軒歷基斯第三次接掌拜仁，首度會見傳媒即有金句，佢強調進攻可以贏波，但防守可以捧盃，即係同廣大球迷講，唔使望拜仁可以場場大勝，最緊要係有獎盃落袋，唔好重蹈上季覆轍。開季以來拜仁果然係身體力行，首兩場聯賽分別以○比一不敵慕遜加柏及一比○險勝禾夫斯堡，兩場波戰情沉悶，有入球出現已算萬幸！




事實上，任何球隊更換教頭都需要時間適應，雖然軒歷基斯對拜仁有一定程度了解，但佢嗰套同前教練尹戈爾好唔同，球員亦需要重新適應，而且拜仁最大問題係大牌球星多，球員又鍾意分黨分派，連副隊長舒韋恩史迪加都承認陣營內士氣低沉，加上洛賓有微傷在身，列貝利狀態亦唔好，咁多不明朗因素纏擾住拜仁，今場小勝一、兩粒已有交代，3.5球細盤其實相當抵玩。


蘇黎世上圈兩場都細


蘇黎世係上季瑞士超亞軍，實力可謂比上不足比下有餘，雖然瑞士球隊畀人感覺係入得又失得，但呢個現象只局限於本土賽事。睇番蘇黎世歐聯上圈對住比利時標準列治，兩隊喺本土聯賽都頻頻開大，不過去到歐聯場合，最終兩回合都係開細，可見歐洲賽同聯賽嘅戰術係兩回事。蘇黎世教練費斯查承認今場目標係和波，相信即使落後一粒都會繼續防守，咁嘅格局睇怕都唔會多波入！