巴西齊腳穩o趙A貨阿根廷

猪拉多纳

14/09/2011
文： Mic少

大家今晚真係可以唔使瞓，除咗有歐聯之外，明早仲有一場叫「羅卡盃」重量級國際熱身賽首回合，阿根廷主場對巴西，由於今次並非於國際賽檔期比賽，兩隊都以本土聯賽球員應戰。近年有多位森巴球星回歸巴甲，令巴西隊可以較佳人腳應戰，包括朗拿甸奴及尼馬，有力擊敗「A貨」阿根廷，平手盤咁筍，要巴西。




（周四早上8時50分開賽）




羅卡盃歷史悠久，由前阿根廷總統羅卡喺一九一四年創辦，目的係促進阿、巴兩國體育交流，繼而成為兩大南美足球強國傳統打吡戰，但賽事踢完一九七六年嗰屆後就停辦，直至今年復辦，採取主客兩回合，次回合將於月尾舉行。


森巴有朗拿甸奴尼馬壓陣


因為賽事並非於國際賽檔期進行，兩隊唔可以強行徵召海外球員入伍，令雙方陣營實力削弱。不過巴西因而得益，事關近年有多位猛將回流巴甲，包括今次名單上嘅朗拿甸奴及費特，而兩位新星尼馬及盧卡斯洛迪古斯亦屬於常規大國腳，効力國體會嘅射手李安納度達美奧上仗熱身賽入波，協助球隊擊敗加納，巴西即使以全土炮比賽，亦唔可以睇小。




反觀阿根廷球壇問題多多，優秀球員都出外搵食，今次大軍最富經驗嘅後衞基文迪洛迪古斯，亦只得十三頂喼帽，其餘球員更不消提。阿根廷喺六月試過以副選踢熱身賽，結果輸畀尼日利亞及波蘭，今仗鬥巴西，更加冇運行。