排怪陣爭響頭炮 羅馬2.4倍「W」抵「錫」

猪拉多纳

22/09/2011
文： 朱楓

窮則變，變則通！羅馬上場作客國米改打怪陣，點知效果出奇地好，賽後「雌狼」上下都話班波有好大進步，今晚喺意甲重返主場對錫耶納，相信係時候打響頭炮，畢竟對手鋒力實在太曳，「讓球主勝」有2.4倍值得一試！




（now633台周五凌晨2:45直播）




由於早前喺歐霸盃出局，加上意甲揭幕戰主場不敵卡利亞里，羅馬上周聯賽作客國米，教練安歷基竟安排中場泰迪同柏路達客串左右閘，踢一個介乎433至253嘅陣式，點知效果出奇地好，一度令國米連半場都過唔到。賽後安歷基話咁安排，係想好似巴塞咁爭取更多控球權，結果出嚟效果好滿意，覺得羅馬踢出佢想要嘅風格，至於柏路達同泰迪亦話唔介意打邊衞，有信心球隊可以繼續有進步。


錫耶納鋒力唔掂


雖然門將史基倫堡上場被盧斯奧踢中個頭一度暈咗，今場肯定缺陣改由盧邦把關，但畀人踢到「男人最痛」嘅迪羅斯就已經冇事，今晚可以繼續披甲，賽前意大利傳媒話迪羅斯上場對國米喺新陣式上表現非常好，好有巴塞中場布斯基斯影子，今晚重返主場比賽肯定更得心應手。




錫耶納今季表現唔算太曳，揭幕戰作客打和卡坦尼亞0:0，上仗主場亦僅以0:1不敵祖雲達斯，但兩場都食白果證明火力超弱，今場對住力爭打響頭炮嘅「雌狼」，睇嚟今晚入到「狼穴」都係凶多吉少！