侯克復出波圖起「菲」

猪拉多纳

23/09/2011
文： 力奇

葡超今晚上演超級大戰，由波圖同賓菲加兩支榜首雙雄對撼。當中佔得主場之利嘅波圖，會有射手侯克復出，反而賓菲加3大殺手唔係養傷，就係好似奧斯卡卡度素咁對親波圖例牌冇料到，此消彼長下，波圖讓半一，上盤2.12倍絕對值得捧場。（開賽時間：周六凌晨3:15）




波圖同賓菲加兩支宿敵今季喺葡超開咧5戰同樣取得4勝1和13分並列榜首，今仗勝負對爭標有住深遠影響。上仗對住弱旅費倫斯意外悶和嘅波圖，查實當日佢哋有首席射手侯克同守將艾華路佩雷拉缺陣，失分都算情有可原，不過今仗二人都可以傷愈復出，陣容變番完整，加上返番今季聯賽2戰全勝入6球嘅火龍球場出戰，就算有中場占士洛迪古斯停賽都冇有怕啦！


賓菲加卡度素唔識入「波」


賓菲加呢邊，5戰入13球火力冠絕葡超，但可惜嘅係，今季聯賽入咗4球嘅前巴塞殺手洛尼圖及入3球嘅巴西中場般奴施薩辛拿基都話會因傷缺陣，前線就只有靠奧斯卡卡度素孭飛。冇錯，呢位巴拉圭左腳重炮今季都有4個「士哥」，射術毋須懷疑，不過力奇睇番數據，原來自佢07年轉戰葡超開始，對親波圖都冇波入，唔到你唔信邪，今仗搵乜同波圖砌？