洪禮賢講馬：尊重康樂名駒破格賽績

猪拉多纳

　　嗰頭「納沙」走咗，呢頭又掛3號波。不斷刮風，跟尾可能有排落雨，本周唔慌會好天得去邊，希望周四夜馬，唔會因為場地受影響，而又爆到好似上個禮拜三咁，啲連贏位千千聲。

　　由於今期跑谷草C+3欄，無可避免要尊重一堆內檔馬。根據近3季檔位紀錄，唔理係1000米、1200米，定係跑到一哩咁長，1至5檔普遍嘅上名率比較高，此外，有啲中外檔，跑咗3季竟然連1W都攞唔到，當然，捧緊蛋嘅檔位終有1日「守得雲開」，不過，與其要等破格，倒不如順應攤路。

上賽餘勢強

　　第二場五班1800米，初步對「康樂名駒」較有好感。1匹長途馬，之前3季初出未入過前五名，就算有新鮮感幫助，上場首戰跑一哩都係略嫌短，但最終畀佢剷入季軍（其實途中騎者處理唔係冇得挑剔），臨尾個勢亦喼住撲向二馬「盈嘉飛駒」。

　　今場由一哩轉到1800米，路程啱得多，加上已開氣，預期尾段爆起上嚟會更勁。至於，落入韋達手上，人馬早已合作，又唔係冇成績交出，同時，查過大告與韋達前季至今谷草合作紀錄，14駒之中，原來只得4匹冇前四名，往績咁準，用嚟做膽應該稱職。