今期突然加強合作 沈集成潘頓有料到

猪拉多纳

　　練馬師沈集成，今季成績甚美滿，目前累積11場頭馬，僅次於蔡約翰及方嘉柏，以兵力而言，沈廐的確不及蔡方兩廐，但成績有本事拍得住大倉，真係值得讚賞。

　　而今期賽事沈廐出馬唔多，只得5駒，不過，件件都有啲機會，但要贏晒，談何容易吖？！勝在部分有賠率可博，而亦有啲係有近績嘅，估計今日呢個馬房唔會冇動靜。同時，睇佢今期賽駒配搭，竟有3駒配潘頓，明顯係加強合作，事關跑了兩個幾月賽事，佢哋只合作咗4次（得3場亞軍），但今期一次過有3駒合作，仲要係實力馬，擺明有心關照，攻勢可能連珠炮發！

　　先講「芙蓉之寶」，初出唔知底蘊，但呢件綵衣鬥志好，而馬在外地兩次試閘贏晒，喺香港試大閘亦唔係冇走勢，如果有級數，初出已有機會上名，總之，十幾倍，不妨小注。「鋼志」跑咗兩場，分別在1400米及谷草一哩入P，如果睇走勢，明顯前仗長直路啱追，肯回師田草係好事，練者心態係想交代，如因同場數匹年輕馬分散視線，令牠的賠率高水，更加抵賭。至於「紅山茶」有幾勁唔使多講，加程至1600米應該惡上加惡。　

Jack