祖記天羅地網 玩殘腳軟傻豹

猪拉多纳

20/11/2011
文： Sherry

呢兩個星期小妹勁多活動，狂返工啦、去啤酒節喪玩啦、操鏢等等，不過講到最開心嘅，就梗係出席好友嘅畢業典禮啦！忙還忙，小妹都有畀心機搵料幫讀者贏錢嘅，今晚祖記強陣迎戰一作客就腳軟嘅「傻豹」巴勒莫，捧2.15「讓球主勝」啦！（開賽時間：周日晚10:00）




上星期日係好友Shan Babe「Grad」嘅大日子，小妹當然都有出席影吓相咁啦，見到老友戴住頂四方帽，當時真係有啲激動，嗰種感覺係好似辛苦咗3年，到今日終於收成、正式投入社會咁，好戥阿Shan開心！




12月就輪到我畢業啦，不過小妹竟然冇乜開心嘅感覺。唔知點解，人有時真係好矛盾，我一方面期待呢日嘅來臨，但另方面又唔想接受自己告別學生時代嘅事實。「這校園這班房這走廊這禮堂……」，周圍都有感情，每處都有自己嘅美好青春回憶，又點會捨得？


祖雲達斯開咧9戰不敗


講到矛盾，巴勒莫就真係意甲嘅代表喇，呢班波主場5戰全勝，但作客竟然5戰輸4場仲要1球都入唔到，點可能差咁遠㗎！今晚佢哋造訪祖記，仲要有中前場3大主力賓利拿、艾保靴南迪斯同艾格巴列圖打柴，點踢呀？




對家祖雲達斯就唔同喇，呢支昔日班霸終於的起心肝，季前大事增兵，家陣開咧9戰不敗，踢少場都守住個4哥位，新兵胡仙歷同弗爆嘅馬特尼仲頻頻有士哥添，今晚佢哋只得守將巴沙利養傷，幾乎夫添出擊，要喺主場炒起「作客蟲傻豹」有幾難先？


Sherry靚盤：祖雲達斯（讓球主勝）


百足咁多爪嘅大學生，熱愛運動，最鍾意同啲Friend唱K兼睇波，曼聯中場路爾斯安達臣同車仔前鋒費托都係佢杯茶！

微博傳情 \(^O^)/

早兩個星期日係小妹今年其中一個最開心嘅夜晚，事關我同班Friends去咗啤酒節，嗰晚我哋雖然飲得唔多，不過個個都玩到好High，癲晒咁不斷整古做怪影相，哈哈！講到最感動嘅一日，就梗係Shan Babe嘅畢業典禮啦，佢仲借咗套「Grad裝」畀小妹影相添，果然係好姊妹！