利雲特「體」高一線

猪拉多纳

20/11/2011
文： 鄭少偉

西甲雖則仍係皇馬同巴塞兩分天下，但講到今季最「火辣」嘅球隊，就非利雲特莫屬。季初就係呢隻「神奇蝙蝠仔」打破皇馬不敗身！佢哋最大殺着係擁有跑不完嘅氣力同唔到飛到嘅拚搏精神，今場作客去到馬體會，主隊陣中班星個個身嬌肉貴，分分鐘又畀「蝙蝠仔」嚇親，「亨利」今場撐利雲特2.45倍「讓客」。（now632及660台周一凌晨3:00直播）




「亨利」今季都幾Buy利雲特，論球員平均年齡，佢哋係西甲最老嗰隊，由於球會莫財，用錢亦非常謹慎，左度右度亦做埋今季西甲用得最少錢增兵嘅球隊，聽落雖然失禮，但正因為季初無咩人會睇得起佢哋，更易偷到雞！只要本身有實力，想發圍都會容易啲，頭9場不敗兼造出7連勝就係咁啦！引用Peter哥嘅金句—「蔗渣嘅價錢，踢出燒鵝嘅味道」嚟形容利雲特就最貼切喇！


馬體會射手法卡奧受傷


事實上，利雲特踢法進取，入球分布點都幾廣，好似首席射手桑盧今季就入咗5球，加上速度快嘅干尼同巴卡路喺前場搞搞震，相信馬體會班後防對住佢哋都幾頭痕！




反觀暫列11位嘅馬體會，就畀人雷聲大雨點小嘅感覺，主要原因係入球過分集中3位球員身上，好似聯賽入嗰13球，有7球係由貴價前鋒法卡奧攞到，另外6球就由阿祖安盧比斯同艾華路杜明基斯瓜分，對手只要派人緊盯佢哋三個，馬體會就好似畀人廢咗武功，更不幸係法卡奧上場拉傷埋，今場未必踢得，咁嘅情況下馬體會仲要讓波似有隱憂，一於撐利雲特「讓客」，想食大茶飯博吓懵要埋客勝！