馬主論戰

猪拉多纳

吼實勁卒過河

　　韋達連續五期賽事封王，手風咁順，當然要繼續吼實佢啲馬。推介第二場「勁卒過河」，上場第二次上陣即刻贏馬，睇嚟係呢個馬房另一質新武器，繼續跑番贏馬路程，應該可以執多一W。

　　另外鍾意第三場配薛達祺嘅「幸運勇士」，季內三戰谷草一哩獲亞季各一，響現評分必定有着數，在港跑咗十三場仲未贏，相信幕後都心急交代，若然能夠喺大賽日開齋，咁就最理想喇。

張敬山

精算縱橫即拼

　　蔡約翰剛戰憑「名舵主」贏馬，依家累積21W，繼續居練馬師榜首，今晚蔡廐出馬唔少，攻勢應陸續有來。推介第四場「浦東之威」，上場響谷草一哩跑第二，只係輸畀「清風駒」半個馬位，證明評分有啲着數，隨時可以補中。

　　另外鍾意第六場「精算縱橫」，今季蔡廐初出馬表現有幾好，相信唔使再多講，呢隻馬吼準國際騎師錦標賽先上陣，擺明有心攞威，值得吼實。

任達華

勁綵係時候出頭

　　蔡明紹剛戰憑「快利多」同「振興中華」起孖兼捧盃，搏殺手風好順，今晚一於捧佢啲馬。推介第四場「勁綵」，在港三戰獲兩亞一季，質素唔使懷疑，今次轉嚟谷草上陣，對手明顯冇咁強，係時候出頭。

　　另外鍾意第五場「帝豪駿駒」，贏馬之後打叠兩仗入Q，只係輸畀頭馬少少，證明仲有分在手，一早已證明谷草啱發揮，今次排九檔起步一樣冇有怕，坐位望贏。

寇鴻萍、梁廷鏘