未落場 先贏陣

猪拉多纳

　　又到一年一度馬壇盛事香港國際賽日，4場大戰由1200米跑到2400米，觀賞價值點會唔大，到時究竟外隊叻啲？定係港隊可以佔主場優勢？其實真係好難講，撇開賽駒實力分野，場地狀態係點，其實對賽果影響好大，好似上屆就係好例子，前置有着數，變相幫咗「締造美麗」一把。

　　外隊之中，有好多馬值得留意，比較熟悉自然係「火箭人」，跑咗23場，攞到18W4Q，準到咁「可怕」，的確係近年少見嘅短途好馬（除咗澳洲「魚子精華」之外），又睇吓佢到時係咪坐二望一。

　　根據「慣例」，4場國際賽之中，港隊照例最弱係喺香港瓶，近屆冇得贏已成「傳統」，上到名嘅亦少之又少，追溯對上1匹入圍已經係05年「自由行」跑入第三名。今屆有冇突破？！「自由好」會係最大希望。

　　雄心威龍星味十足

　　坐定粒六可能係香港盃，港隊兩匹超強賽駒「雄心威龍」和「加州萬里」齊齊上陣，撇開啃唔啃得落「天鷹翱翔」、「諺語」等駒。問心嗰句，主隊呢對馬星味十足、人氣又夠，點都有主場威力，未跑已經嘩嘩聲，屆時喺場內實多擁躉吶喊，正所謂，未落場、先贏陣。希望到時佢哋陣中發揮到應有水準，兩位騎手做到本份，咁就實有得揮。

馬會賽馬節目主持　洪禮賢