陽明飛飛超班三捷

猪拉多纳

　　第九場第二班1200米。「皇帝法令」分數唔覺仲有好大上升空間，喺二班亦唔係一等一角色，不過，論演出穩定性、跑法及路程性能，喺今場數一數二，博W未必化算，做膽則可勝任。

　　此馬自從今季首戰贏完三班此程後，再跑幾場未贏過，唔係計一班嗰場（連番意外）。佢喺二班跑4場谷草及田草短途，總係遇到爭勝「障礙物」，之前輸畀「金鎸龍華」，仲可以話級數有別，再之後嘅3場，大致上跑啱晒，所以，目前評分升穿9字頭，愈來愈有壓力。好在今場真係有冠軍相之馬唔多，佢要入一席位置唔會辛苦。

　　第十場第二班1600米。「陽明飛飛」打叠贏兩W，取勝過程未被威脅過，冇賽事形勢、多走冤枉路、早發力、增程等問題，一一冇影響到佢，除咗超班，冇咩解釋了。

　　今場「陽明飛飛」仲係繼續喺二班跑，所遇對手好多都喺上場輸過晒畀佢，而本身加磅後只負124磅，唔見得條件與上賽有好大分別，唔係忽然走樣的話，季內三出三捷機會甚大。

馬會賽馬節目主持　洪禮賢