史奈達長抖踢得差 國米咬唔入熱拿亞

猪拉多纳

13/12/2011
文： 力奇

因天氣問題改期嘅意甲補賽熱拿亞主場鬥國際米蘭今晚上演，咪睇「藍黑兵團」雖然近期排名回升，查實表現飄忽，新帥雲尼亞里接掌球隊2個幾月始終未執掂，王牌史奈達仲要長抖冇人派牌，今仗憑乜去讓主場硬淨嘅熱拿亞平半？力奇梗係撐1.83倍下盤啦！（now633及660台、廣東體育周三凌晨3:45直播）




力求重奪聯賽冠軍嘅國米，今季開咧出閘脫腳，一度喺降班區域徘徊，9月尾佢哋炒咗主帥加斯柏連尼，搵嚟雲尼亞里接手。呢位一向擅長執手尾嘅意籍名帥，接手後隊波無疑戰績有多少起色，聯賽排名上番第10位，但講到底由佢帶隊嘅15場波，「藍黑兵團」都只係攞得8勝2和5負，勝率叫做僅僅過5成，距離重返勁旅行列仲有一大段距離。


大米剛傷愈狀態成疑


雲尼亞里都承認，國米目前雖然轉番用擅長嘅「442」陣式，但整體發揮依然唔夠流暢，無他嘅，戰術核心史奈達今季長期受傷患困擾缺陣，球隊少咗佢喺中場連繫，又搵唔到人頂上，自然踢得唔好。況且，因傷休戰近兩個月嘅新兵科蘭啱啱先傷愈，就算可以後備上陣都咪寄望太多，雲尼亞里前線惟有焗用柏仙尼拍住迪亞高米列圖。要知道柏仙尼今季發揮差，連帶同球迷關係都受影響，未能專心比賽，至於大米又頻頻受傷，今仗都只係啱啱傷愈復出，想靠佢哋贏波？睇怕唔會容易。


熱拿亞主場出名硬淨


熱拿亞呢邊，射手柏拉斯奧因鼠蹊傷缺陣，要由佢嘅阿根廷同胞柏拉圖頂上，火力無疑會削弱。不過佢哋今季地頭演出硬淨，聯賽主場6戰得3勝2和1負，贏過羅馬，唯一敗仗來自月初對AC米蘭，都只係因下半場打少個先畀人攻入2粒，依家要頂住隊未復舊觀嘅國米有幾難？