巴塞隆拿 山度士強勢出擊

猪拉多纳

14/12/2011

於日本舉行的世界冠軍球會盃進入準決賽階段，南美勁旅山度士及歐聯王者巴塞隆拿今、明兩日輪流上陣。山度士擁有尼馬呢位新世代球王，巴塞則坐擁當今最強美斯，兩大班霸強勢出擊，好睇過戲！

山度士（南美自由盃冠軍） 柏雷素爾Vs山度士

開賽時間︰今晚6:30


世界冠軍球會盃周三晚上演準決賽，南美代表山度士強勢出擊，接受柏雷素爾挑戰。呢隊山度士被譽為自「比利王朝」後最強嘅黃金一代，而且踢完今屆世冠盃後隨時會拆夥，故球隊上下均希望捧盃而回留下美好回憶，今仗可擊敗柏雷素爾晉級。（有線61及201台今晚6時30分直播）


山度士星光熠熠，除咗三名大牌國腳尼馬、甘素同埋艾蘭奴外，其餘波捷斯、漢歷基柏查高、拉菲爾卡比爾都係邊緣國腳，本來以巴西球會嘅財力，根本留唔住陣中球星，但天才球員尼馬希望可以幫山度士攞多啲獎盃至去歐洲發展，可見球隊幾咁團結同埋有歸屬感，今次世冠盃難得有機會同被譽為「地上最強」嘅巴塞隆拿拗手瓜，山度士又點會未入決賽就執包袱？

山度士聯賽留晒力

事實上，山度士應付今次世冠盃可謂相當認真，聯賽季尾已開始畀主力輪流休息，希望佢哋可養足精神，踢好今次世冠盃，而佢哋踢完聯賽之後，亦一早到日本進行集訓，備戰工作一啲都唔馬虎。睇番世冠盃嘅歷史往績，舉行咗七屆賽事，其中六屆南美球隊都打入決賽，巴西球隊仲三度封王添，雖然近年歐洲球隊惡晒，連奪四屆冠軍，但山度士級數遠勝前幾屆參賽嘅國際體育會、學生隊同埋利加大學，相信山度士四強可輕取對手過關。


讓球主客和 山度士 （-1）

推介︰山度士 讓球客勝

巴塞隆拿（歐聯冠軍） 艾薩德Vs巴塞隆拿

開賽時間︰明晚6:30

世冠盃準決賽終於輪到「地上最強」登場，巴塞隆拿會撲擊卡塔爾球會艾薩德。巴塞未出發之前，當代球王美斯透露球隊十分重視今屆世冠盃，所以今趟赴日絕對唔係為咗買電器「濕平」，目標係全力衝冠！巴塞嚟真試問艾軍有何能力抵擋得住，預計大炒可期。

（有線61及201台明晚6時30分直播）

巴塞上屆無緣戰世冠，眾星難免有點掛念呢項盃賽，而且仲好想回味○九年奪冠時刻。美斯出發前透露，球隊今次赴日絕對唔係玩玩吓，因為每個錦標對巴塞都好重要，所以球隊會使出渾身解數爭標。事實上，巴塞常規主力都有隨隊參賽，以巴塞嘅豪華陣容去秤，級數超班奪標機會最高。

睇番巴塞對上一次參與嘅○九年世冠盃，「地上最強」態度認真，準決賽面對墨西哥球會阿蘭特，憑「三斯」布斯基斯、美斯及柏度洛迪古斯各入一粒反勝三比一晉級，所以球迷毋須擔心教練哥迪奧拿會在首戰留力，艾軍今場肯定難踢。

艾薩德乏大賽經驗

其實艾軍甚少面對歐洲強隊，當遇上巴塞排山倒海式攻勢時，好可能站唔住腳愈踢愈亂，大敗一場根本唔出奇。不過試問當今世上又有幾多支球隊能夠抵禦巴塞強攻時而不失霸氣呢？艾軍最好有心理準備遭受蹂躪。

自千禧年起，巴塞至今曾兩度參與世冠盃賽事，進行過四場比賽，四仗對手剛巧同樣來自美洲地區，分別面對中北美洲冠軍及南美洲區冠軍各兩次，盤路結果為兩贏兩輸，可留意兩次四強賽都能贏盤，但兩次決賽卻要輸盤。

讓球主客和 巴塞隆拿（-3）

推介︰巴塞隆拿 讓球客勝