銀河艦隊撞散西維爾

猪拉多纳

17/12/2011
文： 朱楓

聯賽係長命賽！雖然皇家馬德里輸咗「國家打吡」，但今晚只要作客擊敗西維爾，就可以搶番一哥位置「過冬」，近日躁到爆嘅C朗拿度盡情起腳爭取入波發洩，畢竟西維爾上季4對「銀河艦隊」錄得全敗，2.02倍「讓客」要捧！（now632台周日清晨5:00直播）




皇馬今季打得咁好，可惜上輪喺「國家打吡」仍然打破唔到宿命，主場1:3不敵巴塞，賽後仲被巴塞搶去榜首位置。其實皇馬迷又唔使咁灰，皆因「銀河艦隊」其實比巴塞少打一場，今晚喺2011年最後一場西甲作客西維爾只要唔輸，就肯定名正言順以「一哥」身份過冬，朱楓相信皇馬必定全力爭勝。


南美兵提早放假搏命


其實皇馬周中已成功反彈，喺西盃作客輕取丙組仔晉級，當中教練莫連奴更畀C朗拿度擔正落場發洩，結果佢最後亦入咗球靚波，今晚再對西維爾隨時又大開殺戒，加上西班牙網站《簽約》爆料，話莫連奴肯定唔會喺西盃又攞紅牌嘅艾比奧爾擔正，加上賽後又披露希古恩、卡卡、迪馬利亞同馬些路4名南美兵，踢埋今場就可以提早放假返家鄉預祝聖誕，相信今晚落到場一定加多兩錢肉緊報答主帥。


上季4鬥西維爾全勝


對家西維爾今季有復甦迹象，暫時排第5，有機會衝擊下屆歐聯資格，但亦因為表現太好，前鋒簡路迪自爆收到俄超富豪球會安治斟介，後衞馬田卡沙利斯亦盛傳獲祖雲達斯同巴黎聖日耳門垂青，各人準備散水咁款，難免影響軍心，不過朱楓今場睇死西維爾最大原因，係佢哋上季4對皇馬竟然錄得全敗，入2球勁失10球，擺明係兩個Level，睇怕今晚都好難避得開輸波嘅厄運！


橫數千軍


西維爾對賽輸條街




‧近8戰3勝2和3負，半場未試過落後。

‧上季4度交手全敗。

皇馬為西甲作客王

‧目前西甲作客王，錄6勝1和1負，勝率高達75%。

‧近8戰7勝1負，有7場開大。