新特蘭「+1」元旦攞頭彩

猪拉多纳

01/01/2012
文： 蘇豪

英超元旦日尾場由新特蘭主場對曼城，「黑貓」早前由奧尼爾領軍後未輸過盤，表現脫胎換骨，今場雖然後防不整，但憑鬥志有力頂住對手。曼城上場作客西布朗冇料到，今仗一樣咁難踢，讓波信唔過，蘇豪要「讓球主勝」！




（有線300及200台周日晚11時直播）




新特蘭由新帥奧尼爾領軍後極速反彈，球隊人腳冇大變，但踢落好有Heart，近四戰取得兩勝一和一負，唯一敗仗僅負於前列球隊熱刺，計盤路未輸過，上仗如非球證誤判十二碼隨時贏埋愛華頓，反映大軍進步幅度甚大。雖然「黑貓」現時傷兵甚多，守將巴士利及巴布爾今仗難望披甲，中堅米高端納、射手費沙甘保及域咸等亦需養傷，但有奧尼爾呢位大魔術師領軍，對住曼城不落下風！


曼城被打窒道氣


另一邊廂曼城於聖誕快車期失利，球隊上輪作客西布朗老鼠拉龜，中場指揮官大衞施華踢到冇晒影，射手阿古路及巴洛迪利腳風同樣欠順，全場到肉攻勢唔多，勢頭明顯不及季初。曼城守將米卡李察士及高拉洛夫今仗有望復出，人腳相當完整，逐個秤當然高過對手，不過大軍近期畀曼聯追到有氣冇碇抖，現階段真正考驗抗壓能力，但似乎未能予人太大信心。




往績方面，新特蘭近兩次主場對曼城取得一勝一和，雖然兩位士哥功臣堅韋尼鍾斯同戴倫賓特已離隊，但現時前線仍有回勇射手賓特拿擔正，後防則有前曼聯成員奧沙及布朗頂住，絕對有本錢搶分，受讓可博「讓球主勝」。