皇馬大舉響頭炮

猪拉多纳

03/01/2012
文： Mic少

新一年西班牙波由西班牙盃十六強首回合揭開序幕，重頭戲皇家馬德里主場迎戰馬拉加。上屆盟主皇馬班球星放完假叉足電，猶如猛虎出柙，勢必貫徹進攻踢法，打響新年頭炮。馬拉加財大氣粗，戰將有質素，亦唔會怕對手，有力爭取作客入球，入球大細中位數調至3.5球，照捧大盤。




（now 632周三清晨5時直播）




皇馬教練莫連奴今季一改以往沉穩作風，大踢進攻足球，領先後都唔會放軟手腳，所以今季聯賽入球數字仲多過巴塞隆拿。而且莫帥無論大小賽事，幾乎場場強陣出擊，例如上圈西盃首回合對丙組仔邦弗拉甸拿，都派天價巨星C朗拿度上陣，更何況今仗對手係同屬西甲嘅馬拉加。


Ｃ朗叉足電搏殺


另外，皇馬球員放完聖誕新年假期後，莫連奴都想了解各人狀態，相信今場會盡遣主力搏殺，而且佢亦希望趁首回合有地利，盡數對手，早日奠定晉級優勢，以免夜長夢多，影響未來賽事部署，所以勢必採取主攻。睇番上屆成績，皇馬在前年尾西班牙盃十六強首回合主場大勝利雲特八比○，而新年首仗則作客贏基達菲三比二，大盤絕對有迹可尋。




馬拉加喺卡塔爾財團支持下，近年羅致多位高質素球員，成績亦有明顯進步，聯賽已殺上中上游。但想要爭西甲錦標，仍有一段好長嘅路要行，佢哋應會倣效曼城，先向盃賽埋手，希望攞個盃仔威吓，爭勝意欲不亞於皇馬。基於佢哋聯賽主場吞過皇馬四蛋，所以作客入唔到波，次回合返主場都好危，今場隨時搏咗先講。