巴塞「-2」手到拿來

猪拉多纳

04/01/2012
文： Mic少

世冠盃盟主巴塞隆拿2012年第一擊，將於西班牙盃十六強首回合主場對奧沙辛拿，巴塞一向「胃口」非常大，以囊括所有錦標為己任，爭標決心唔使懷疑。球王美斯更提早結束假期歸隊搏殺，鬥心非常旺盛，隊友們更加唔可以偷懶，可翻炒奧沙辛拿，巴塞「-2」照捧1.63倍「讓球主勝」。（now 632周四清晨5時直播）




巴塞上屆西班牙盃決賽輸畀死敵皇馬，球隊上下仍然耿耿於懷，更加渴望奪取今屆冠軍，剃皇馬眼眉。會方原本特別批長假畀美斯休息，但佢都唔要，日前已提早歸隊助陣，戰意非常高昂，班隊友睇到「大佬」美斯咁搏命，實在唔好意思揸流攤。




除咗美斯歸隊之外，巴塞收到另一個好消息，喺世冠盃受傷嘅前鋒阿歷斯山齊士已復操，可以隨時候命，中前場進攻人腳充裕，即使韋拿長抖亦冇影響，主場出擊更加要爭取大勝，奠定晉級基礎。


奧沙聯賽作客魯營吞8蛋


事實上，巴塞魯營球場屬於任何球隊嘅噩夢，佢哋今季聯賽九場主場攻入三十九球，兼冇失波。奧沙辛拿感受應該最深刻，去年九月聯賽作客慘吞巴塞八蛋，淨係上半場已輸咗五球，睇見班球員輸到想喊。今次重遊傷心地，隨時有心理陰影招致大敗。