藍月亮大賽孖寶至叻Solo

猪拉多纳

08/01/2012


英格蘭足總盃第3圈今晚上演曼市超級打吡，撞正兩軍齊齊中門大開，火力比併會係今仗勝負關鍵。曼城孖寶阿古路同大衞施華都係大賽專家，一個入波一個助攻合作無間，對住曼聯失魂雙箭朗尼同貝碧托夫，前者近排同爵爺鬧翻無心戀戰，Hea碧例牌大賽失蹤，藍月亮睇怕唔難射爆紅魔！


托尼兄弟備戰非國盃缺陣


托尼兄弟因為要飛去巴黎會合科特迪瓦大軍備戰非國盃，今仗唔踢得，其中防中耶耶托尼係曼城取得佳績核心人物，高路托尼亦係防線重臣，冇佢兩兄弟必定影響球隊防守力。




至於紅魔防線自從隊長尼曼查維迪重創收咧後，幾乎場場執位，無論搵菲爾鍾斯定莊尼伊雲斯踢中堅一樣牙煙，老將里奧費迪南表現又持續跌Watt，上仗畀紐卡素搞掂佢都要孭大鑊，今仗曼城前線眾星唔難開餐取得士哥。




其實曼市雙雄今季正係英超攻門效率最高兩隊，曼城係英超進攻王，20輪已經轟入56球，射門次數亦係英超最多嘅282次；僅隨其後嘅曼聯則攻入49球，但射門入波率高達20.16%就更勝曼城。




不過，喺英超入咗14球排射手榜第3位嘅阿古路，大賽表現一向出色，對親Big 6均有入波或助攻。拍檔大衞施華大戰同樣鍾意Solo，現時更以10次助攻位列助攻榜「一哥」。


曼聯雙箭近況低沉


另邊廂嘅紅魔雙箭本來數據一樣唔輸蝕，但衰在近況轉沉，上輪聯賽對住紐卡素淨吞3蛋，係佢哋自今年5月初0:1不敵阿仙奴後，喺各項賽事中首次冇波入，之前連續34場入波紀錄告終，全場僅得6次射門更徹底反映前線狀態低沉。

當中今季本來腳風唔錯嘅朗尼，上星期被爆因為夜蒲同領隊費格遜反面，先被雪藏一場，上仗解凍復出明顯踢得患得患失。尋日英國《獨立報》更爆料指費Sir已經決定啱價就賣走朗尼，雖則魔童之後同紅魔急忙聯署發聲明否認其事，但空穴來風未必無因，對士氣肯定有打擊。

再者，之前不受費爵爺重用嘅Hea碧，近仗做番正選雖然即有貨交，但佢踢親大賽例牌冇影，就算歐聯決賽費Sir連後備席都懶得擺佢落去，今晚紅魔想靠佢翻身真係危危乎啦！