塞圖巴爾大難臨頭

猪拉多纳

14/01/2012
文： Fufu

FuFu嗜球如命，無論「睇賭踢」，均達狂熱程度，曾在facebook個人狀態寫上「我愛足球，至少她總令我快樂」，抒發當時與女朋友冷戰的愁緒，今天FuFu很想在facebook再寫一句「我愛足球」，但後續的是「可恨好腳難求」。




打牌講牌品，牌品好即是「好腳」，自然長打長有，踢波亦然，踢衞生波唔守時或放飛機，無論幾好波或幾斯文，在FuFu字典裏已屬冇「波品」，要其他人等足半小時才夠腳開波，甚或出現大場「五打五」的悲壯場面，有得揀，仲點會搵你踢？FuFu作為球賽搞手，甘願擔起訂場及約人等瑣碎工作，金錢上有蝕冇賺，只願大家每星期能好好享受足球樂趣，無奈這份熱情未能感染一眾波友，隨意放飛機，例牌遲到，如此紀律怎能容忍？FuFu明白不能以自己準則看待別人，但在足球生涯步入黃昏的階段，FuFu實不希望命運掌握在別人手裏，決意農曆新年後將球賽改革，姑勿論成效如何，至少不用再忍受那些爽約與遲到的人。




今晚FuFu推介賓菲加大盤，這支葡超榜首班霸今季七次主場聯賽全勝，當中除對宿敵士砵亭小勝一比○外，其餘六仗遇弱均開大盤，加上近三仗全勝兼場均最少省四粒，攻力着晒火，以今晚對手塞圖巴爾季初作客波圖及士砵亭分別吞三蛋演出，造訪另一「Big3」可謂「大」難臨頭。（周日凌晨2時30分開賽）